Jounen entènasyonal lang matènèl: Ayiti dwe konstwi yon lekòl pou Ayisyen, daprè Nesmy Manigat

Nan okazyon Jounen entènasyonal lang matènèl, ki komemore chak 21 fevriye, minis Edikasyon nasyonal la, Nesmy Manigat, raple obligasyon pou Ayiti " konstwi yon lekòl pou Ayisyen". Daprè Nesmy Manigat, " elèv yo ap aprann lòt lang rejyon an pi vit, ak tout lòt matyè kourikoulòm 2024 la", avèk itilizayon Kreyòl la antan ke lang matènèl.

" Apre 220 ane endepedans" , minis Edikasyon peyi Dayiti a, Nesmy Manigat, estime ke peyi a dwe konstwi yon lekòl pou Ayisyen, nan yon piblikasyon li fè jodi madi 20 fevriye a sou paj Fesbouk li. Nesmy Manigat nan piblikasyon sa montre enpòtans ansèyman lang Kreyòl la genyen nan lekòl yo an Ayiti.

Nesmy Manigat pwofite pou l raple ke, nan kad komemorasyon Jounen entènasyonal lang matènèl la, Kreyòl la, selon sa li di, se yon matyè obligatwa " depi nan preskolè rive nan egzamen bakaloreya".

Nesmy Manigat fè referans nan sans sa ak yon dokiman ki pote non " Kad oryantasyon kourikoulòm Fondamantal ak Segondè (2024-2054). Dokiman sa enskri l nan pwosesis pou fè pwomosyon pou lang matènèl nou, ki se Kreyòl. Li konsène divès dòmèn ak matyè ki etidye nan klas fondamental tankou nan segondè. N ap pale de lang ak kominikasyon, ki gen ladan Kreyòl, Fransè, Anglè, ak Espayòl ; Devlòpman pèsonèl ak sosyal, kote yo pale de Edikasyon pou sitwayen, Edikasyon atistik, ak kiltirèl, ak lòt; Syans matematik ak esperimantal; Syans sosyal, epi Teknoloji ak Aktivite pwodiksyon.

N ap siyale ke Jounen entènasyonal lang matènèl la, komemore chak 21 fevriye nan yon ane. Se Unesco, yon Ògan Nasyon Zini ki okipe l de zafè Lasyans ak Ledikasyon ki mete l sou pye nan lane 2000. Nan kad komemorasyon Jounen an pou ane 2024 la, tèm ki kenbe pou ane a se " Edikasyon miltilang se yon pilye pou aprantisaj generasyon yo".

Ralph Thierry Cadet