Nan sousi pou valorize enplikasyon fanm yo nan travay konstriksyon kanal Wanament la nan depatman nòdès peyi a, Kolektif Fanm Angaje Pou Ayiti ki gen nan tèt li ansyen minis Kondisyon ak Dwa Fanm nan, Marjory Michel, onore sèt (7) travayèz mason k ap travay san kanpe sou chantye sila a.
Aktivite sa a te fèt jounen lendi 16 oktòb la, lavèy jou pou komemore 217 lane asasinay papa nasyon an Jean-Jacques Dessalines LAGRAND. Se kòdinasyon nò Kolektif la ki gen nan tèt li militan Sasciard Brutus ki te fè jès senbolik sa a ak travayèz yo.
Daprè sa madanm Brutus fè redaksyon Amitié FM konnen, chak benefisyè yo te resevwa yon bèl tablo ki enprime ak foto yo epi yon tèks ki idantifye yo kòm modèl fanm vanyan pou jenerasyon sa a. Foto sa yo te pran nan moman medam yo t ap voye kout tiwèl, mare fè, bwase mòtye menm jan ak mesye yo k ap travay nan konstriksyon kanal Wanament la.
Nan yon ti bout video kòdinasyon nò Kolektif Fanm Angaje Pou Ayiti pataje ak redaksyon an, benefisyè yo pa kache kontantman yo pou jès sa a ki daprè sa yo esplike, ba yo plis devouman ak detèminasyon pou yo kontinye reprezante kòm sadwa sektè fanm peyi a nan gwo pwojè nasyonal sa a. Sou bò pal, reprezantan Kolektif la te pwofite voye yon gwo kout chapo pou ansyen minis fanm nan Marjory Michel ak kòdonatris adjwent la, Yvelyne Antenor ki te pran inisyativ sa a.
Comments