Ayiti selebre Jounen entènasyonal lang manman ann sou tèm «Lang manman: kreyòl nan lajistis»

Akademi Kreyòl Ayisyen nan kolaborasyon avèk divès enstitisyon¸ selebre mèkredi 21 fevriye 2024¸ Jounen entènasyonal lang manman¸ sou tèm «Lang manman: kreyòl nan lajistis».

Jodi mèkredi 21 fevriye 2024 la¸ Akademi Kreyòl Ayisyen avèk plizyè lòt enstitisyon nan peyi Dayiti ¸ te pran randevou nan lokal Rektora Inivèsite Leta¸ pou selebre Jounen entènasyonal lang manman¸ ki fèt ane sa sou tèm «Lang manman: kreyòl nan lajistis». Se Akademi Kreyòl Ayisyen ( AKA) ki fè chwa de tèm sila.

Rosilia François Corneille, ki se vis-prezidan Akademi Kreyòl Ayisyen, fè konnen ke ‘’ tèm sa a genyen tout sans li sitou lè nou konsidere lang manman nou an poko jwenn plas li merite a nan branch lajistis la kòmsadwa’’. Vis-prezidan Akademi Kreyòl Ayisyen an

kwè ke jounen 21 fevriye sa a se yon ‘’ jou istorik’’¸ nan kontès kote AKA ap fete 10èm lane egzistans li.

Nan kad konba k ap mennen pou lang kreyòl la¸ yon ’Chè : lang kreyòl nan lajistis“, ke dwayen Fakilte Dwa ak Syans ekonomik (FDSE) la te bay detay sou enpòtans li¸ rive mete sou pye. Mèt Eugène Pierre-Louis¸ dwayen FDSE ¸ a fè konnen ke chè sa a ‘’ pral kontribiye nan fòmasyon avoka, jij, uisye, notè, etidyan, elatriye’’.

Nan kad Jounen sa¸ se te okazyon pou responsab yo te prezante rezilta konkou tradiksyon « Ak Endepandans peyi a » ak Diskou Jean-Jacques Dessalines te pwononse premye janvye 1804 nan Gonayiv. Se rektora Inivèsite Leta Ayiti a ak Akademi Kreyòl Ayisyen an ki te òganize konkou sa a.

Selon rezilta ki se prezante yo¸ Esaih Jean Ernest Belance¸ etidyan Fakilte Lengwistik Aplike (FLA)¸ ranpòte premye pri a ; Nissi Gabriella Jean (FLA, dezyèm pri) ; Anne Lennie Jean-Baptiste (IERAH, twazyèm pri) ; Lewis Parisien (FAMV, katriyèm pri) ; epi Fatsenky Saint-Pierre (FLA, senkyèm pri).

N ap souliye ke plizyè lòt enstitisyon tankou ministè Edikasyon nasyonal ak Fòmasyon pwofesyonèl (MENFP), Fakilte Dwa ak Syans ekonomik, Fakilte Lenguistik aplike, Ofis pwoteksyon sitwayen, Lekòl majistrati¸ te mete ansanm¸  pou selebre jodi mèkredi 21 fevriye 2024 la Jounen entènasyonal lang manman.

Ralph Thierry Cadet