Nan objektif pou kore pwodiksyon nan lang kreyòl la ¸ Ministè Edikasyon nasyonal deside mete sou pye yon finansman ki pote non ‘’ Soutyen pou Kreyolofoni Syantifik’’.
Nan yon sikilè li mete deyò nan dat ki se 21 fevriye 2024¸ Ministè Edikasyon Nasyonal ak Fòmasyon Pwofesyonèl (MENFP) ¸ fè konnen ke finansman sa dwe ede nan pwomosyon ¸ devlòpman¸ valorizasyon ak itilizasyon lang kreyòl la.
‘’ Se Komisyon Nasyonal Syans¸ Teknoloji ak Inovasyon ( KONASTI)¸ ki te kreye nan dat 29 jiyè 2022¸ ki gen manda pou travay sou mizannèv finansman sa a’’¸ daprè Sikilè a.
Selon Ministè Edikasyon Nasyonal ( MENFP), ‘’ Soutyen pou Kreyolofoni Syantifik’’ lan dwe favorize : Finansman chèche endividyèl¸ ekip rechèch ou òganizasyon k ap travay pou devlopman lang kreyòl la.
Yon lòt bò, li dwe ede tou nan : Patisipasyon nan ankadreman pèsonèl akademik ak syantifik kap anseye ¸ devlope ou fè pwomosyon lang kreyòl, elatriye.
Nan kad yon dotasyon inisyal finansman sa a ¸ Ministè Edikasyon Nasyonal, anonse li pral mete sou kanpe yon Pri syantifik endividyèl ¸ k ap koute 500 mil goud. Pri syantifik sa dwe baze sou ekselans akademik nan redaksyon travay la¸ pètinans sijè a pou transfòmasyon Ayiti ¸ kontribisyon nan avansman konesans nan domèn nan ak tout lòt kritè ki nesesè, selon minis Edikasyon nasyonal la, Nesmy Manigat.
Ralph Thierry Cadet
Comments