15 janvye 2024, se dènye dat ministè Edikasyon nasyonal ak Fòmasyon pwofesyonèl fikse pour tout direktè lekòl ranpli fich enfòmasyon anliy sou elèv yo ak pwofesè yo. Se biwo kominikasyon ministè a ki anonse nouvèl sa a nan yon nòt pou laprès li pibliye nan dat 11 desanm 2024 la.
Nan dokiman sa a, ministè a ki salye tout responsab lekòl yo pou travay ki fèt pou ranpli done sou elèv yo, pwofesè yo ak lekòl yo sou platfòm Ministè a mete kanpe pou sa, sou sit wèb Ministè a, fè konnen gen plis pase yon milyon elèv, 17 mil lekòl ak plis pase 30 mil anseyan ki deja anrejistre.
"Se yon kokenn chenn avanse nan travay k ap fèt pou ministè a ak peyi a genyen yon Rejis pou anseyan, yon Rejis pou elèv ak yon Rejis pou lekòl yo. Travay la ap rapouswiv ak kolaborasyon tout ajan edikatif. Tout bon jan desizyon pou amelyore kalite lekòl la dwe chita sou bon jan done", se sa nou li nan nòt pou laprès MENFP a.
Pou fini, ministè Edikasyon nasyonal ak Fòmasyon pwofesyonèl fè konnen okenn lekòl pap ka enskri elèv nan egzamen Leta yo, ni benefisye sipò Leta, ni genyen pèmi fonksyone si li pa respekte obligasyon sila a ki se ranpli fich ankèt anliy pou chak elèv gen yon nimewo idantifikasyon eskolè inik (NISU) epi pou chak pwofesè genyen pèmi anseye.
PLR
RADIO AMITIÉ 104.7 FM
Comments