Akòz sitiyasyon politik ak sekiritè malouk peyi a ap konnen depi plis pase yon mwa, ministè Edikasyon nasyonal oblije adopte epi pibliye yon lòt kalandriye pou ane eskolè 2023-2024 la.
Daprè nouvo kalandriye sila a ki pibliye jodi jedi 4 avril 2024 la, egzamen 9yèm ane fondamantal yo ap fèt sori 22 pou rive 24 jiyè. Soti 22 pou rive 26 jiyè, se pral dat pou dewoulman egzamen Ekòl Nòmal Enstititè. Nan menm sans sa, ministè a rapousuiv pou l fè konnen egzamen Sant Edikasyon familyal yo ap fèt nan dat 22 pou rive 26 jiyè. Nan sa ki gen a wè ak egzamen bakaloreya a, l ap fèt soti 5 pou rive 8 out k ap vini la a.
Nouvo dispozisyon pou egzamen 9yèm ane
"MENFP ap ensiste tou sou òganizasyon egzamen 9yèm ane yo ane sa a, sitou pou nouvo matyè yo tankou Edikasyon Sivik, Edikasyon Fizik ak Espòtiv, Edikasyon Atistik ak Estetik, ak Edikasyon sou Teknoloji ak Aktivite Pwodiksyon. Egzamen sa yo ap obligatwa", se sa ministè a fè konnen nan yon kominike pou laprès li rann piblik jodi a.
Toujou nan sa ki konsène 9yèm ane, MENFP deja distribye pwogram yo pou matyè sa yo nan 10 DDE yo pou pwofesè yo byen ankadre elèv yo. Pou premye ane eksperimantasyon evalyasyon 4 nouvo matyè sa yo, Ministè a mande elèv yo rete tèt frèt pandan l ba yo garanti l ap òganize yon egzamen espesyal ki pa dwe penalize okenn elèv.
"Jan sa te fèt ane pase, MENFP ap akonpaye tout elèv pou ede yo reyisi egazamen yo nan mete sou pye tout kalte pwogram edikatif sou radyo, sou televizyon, sou kle USB, sou sit ministè a, ak kou konpansasyon aprantisaj ak prezans anseyan toupatou, sitou pou depatman lwès la ak lòt zòn ki pi afekte yo. Ministè a ap salye travay responsab lekòl toupatou nan peyi a ki itilize tout mwayen pou kontinye akonpaye elèv yo nan aprantisaj yo, malgre anpil difikilte", se sa nou li nan kominike MENF a.
Apèl pou pwoteje dwa timoun yo
Nan menm kominike sa a, ministè a renouvle apèl li bay tout sektè ak patnè l yo pou pwoteje Dwa pou Ledikasyon pou tout timoun ak jèn yo e pwoteje lekòl ak inivèsite yo. Se sèl fason pou nou pèmèt timoun ak jèn yo byen prepare avni yo. Se poutètsa, MENFP kondane tout atak kont lekòl ak inivèsite nou yo.
Enskripsyon anliy yo ap rapousuiv
Pou fini, ministè a, nan kominike pou laprès li a, pwofite raple tout direktè lekòl enskripsyon anliy pou elèv ak pwofesè yo ap fini nan dat 12 avril 2024. Se sou sit ministè a chak responsab lekòl dwe ranpli fòmalite sa a. Se youn nan kondisyon obligatwa pou yon lekòl patisipe nan egzamen Leta yo.
PLR
Radio Amitié 104.7 FM
Comments