“Gen anpil rimè koripsyon sou detounman lajan ransèyman Palè Nasyonal ak kòb ki ta bay pou sèten kandida rive kòdonatè Konsèy la oswa Premye minis”, selon Montana

Nan yon nòt ofisyèl BSA raple depi enstalasyon ofisyèl Konsèy Prezidansyèl Transisyon (KPT) an 25 avril 2024, misyon nouvo ekzekitif Leta a te defini nan Ako 3 avril la ki te etabli apre yon konsansis ant diferan sektè sosyal ak politik pou adrese soufrans popilasyon an, espesyalman pandan twa dènye ane yo.

Sis semèn apre, KPT a poko respekte angajman li te pran devan sosyete a. Ako 3 avril la, ki bay Konsèy la manda, poko pibliye nan jounal “Le Moniteur”.

Konsèy la, ansanm ak Gouvènman demisyonè a, pibliye yon dekrè ki siprime tout referans ak konsansis ki mete li an plas.

Pou Montana, refize pibliye Akò a se fè tranzisyon an tounen yon savann kote Konsèy la fè sa li vle, anpeche sosyete a mezire zak li yo. Ako a prevwa ke manm Konsèy la dwe mete tèt yo an règ avèk lalwa nan yon maksimòm 30 jou apre enstalasyon.

Biwo Swivi Akò Montana a (BSA) ak tout popilasyon an ap tann anons ki fè konnen manm Konsèy la ranpli fòmalite pou mete tèt yo an règ ak lalwa.

Selon BSA, gen anpil rimè koripsyon sou detounman lajan ransèyman Palè Nasyonal ak kòb ki ta bay pou sèten kandida rive kòdonatè Konsèy la oswa Premye minis. BSA a mande Konsèy la pou reyini ak sektè yo pou pibliye Akò 3 avril la, ki se bousòl tranzisyon an, epi mete tèt yo an règ avèk lalwa pou pèmèt transparans ak batay kont koripsyon.

Fritz Laventure